أشتهي تصديقك ..
عندما تتغزل في صوتي ، فأنفجر ضاحكة ..
أشتهي أن أصرخ بك ..
عندما تستهزأ في نطقي بعض الحروف ، فأنفجر ضاحكة أيضاً ..

أنا أُدرك أن صوتي تلتصق به بحة عادةً ما أُسميها ( نشازاً ) و تُسميها أمي ( نبرة الفخامة ) ..
أما الحروف ، فهل لي أن أسألك : هل تعلَم عن قصتي مع الحروف الأبجدية شيئاً ..!؟
هي قصة قديمة ، أحداثها كانت في سنوات عمري الأولى ..
حينها ، كنتُ ألعب ، و أصعد سلّماً ، حادةً عتباته ، فانزلقت رجلي و وقعت ، وقعت على لساني ..
و جُرح جرحاً عميقاً من النصف ، فكاد أن يُقطع ، لولا لُطف الله ثم نَقلي إلى المستشفى في عجلة ، فكانوا أن خاطوا لساني ب 7 غُرز ..
7 غُرز أبكت أمي ، و أرعبت أبي ، كانوا يَخشون مرحلة ما بعد التئام الجرح ، كيف لي أن أنطق الحروف ، كيف سأتحدث ، كيف سأتخاطب مع العالم من حولي ..
و كبرت ، و التئمت غُرز لساني ، و اشتدت ..

و استطعت أن أتحدث ، و استطاعت الحروف الأبجدية أن تعبر على لساني من فوق الجرح ، فتنزلق بسهولة و سلاسة ، فيما عدا حرف ( الراء ) ، فكان يضغط على الجرح القديم ، فيتعثّر ، إلى أن يخرج منطوقاً ، فيلفظه لساني بعيداً حيث منفى الحياة ..

و تمر الأيام ، و أصبح كاتبة ، أتحدث ب 3 لغات ، بطلاقةٍ و حرفِ راءٍ يتمخض إلى أن يُولد ..
و تمر الأيام ، و تهواني ، و أهواك ، و تستهزأ بنطقي ، و أشتهي أن أصرخ بك ، فأنفجر ضاحكة ..

أحبك

     يا مرة إنتي دايرة تجننيني؟؟

       
جملة ممكن تسمعه بين راجل ومرتو وهم بيناقشو في حاجة بعيدة من الرومانسية
ممكن يكونوا ماشين في السوق راجين المواصلات .... قاعدين يتغدوا...
وفجأة يندلع نقاش ،،،وتلقى الراجل جرا في مرتو نور طويل وقال ليها (يا مرة إنتي دايرة تجننيني؟)
وهي طوالي تنفي التهمة وتوجهة ليهو (والله انت الداير تجنني) من يومي اللميت فيك وأنا مشلهتة ،،
عان كمان دايرة تجننيني والله ياهو، ضربني وبكا وسبقني اشتكا ،،،
انت قيس بن الملوّح دا ماسمعت بيهو
مجنون ليلى... وبعضهم يناديه بمجنون بني عامر خلى الدنيا كلها وقابل ليلى لمن جننتو وخلتو لافي صينية
الغريبة في قصة مجنون ليلى انو ليلى ما مابياهو دايراهو وكاسرة رقبته وراهو ودا البيخليني اشك
في انو قيس دا مجنون من يومو ، ليلى بتحبو زي ما بحبها البيخليهو يجن شنو؟...
كان ما عدم شغلة منو ، واظنو عندو وسواس ، قالو من كترة ريدتو ليها ، وقت يجي يرقد
وينوم في الليل يقعد يفكر (يا ربي ليلى اتعشت ولاّ باتت القوا؟) اسي عليكم الله وبصراحة كدي
فيكم زول بحب واحدة بفكر انو اتعشت ولا لا؟ ، يفكر فيها لما يكون جيعان يضرب تلفون
ويتونس معاها ويقول ليها (مبسوطة وتقرقري كدي تلقيكي متعشية تحمدي سيدك) ، وقالو
بلغ الهيام والاستلاب بقيس انو لما يجي يشرب شاي الصباح يودي كباية الشاي غلى خشمو ويصدها تاني
ويفكر (يا ربي ليلى تكون شربت الشاي؟.... والله خايف يكونو مكملين السكر؟..وما شربت الشاي!)....
في ضمتكم دي ، فيكم زول سعل حبيبتو شربت الشاي ولا لا؟ يا كضابين!.
علا تجي هي ويقابلها وتشكي ليهو من وجع الراس وانو قريفت الشاي رامياها
قالو الزاد جن قيس انو خطب ليلى ودفع في المهر تلاتين ناقة حمراء وجا واحد اسمو ورد
دفع عشر ناقات بس! ، اهل ليلى ادوها لي ورد وحمو قيس ، اها قال لهم اوريكم الجن الما بتعرفوهو
بقى حايم ساكت ويلعب مع الشفع يامطيرة صُبي لينا..اها.. الناس قالو لأبوهو قيس دا ما عندك حل
غير توديهو الحج ، وهناك خليهو يسعل ربنا يتوب عليهو من حب ليلى ، مشو الحج هو وابوهو
في الحج ابوهو قال ليهو اسعل ربك ، قيس قال لي ربنا اغفر لي ذنوبي كلها وزيدني في حب ليلى ،
وخليني اغرق فيهو لي اضنيّ ، وقال:

`ذكرتك والحجيج لهم ضجيج بمكة والقلوب لها وجيب قلت ونحن في بلد حرام به والله أخلصت القلوب
أتوب إليك يا رحمن مما عملت فقد تظاهرت الذنوب وأما عن هوى ليلى وتركي زيارتها فإني لا أتوب
شفتو قوة راس الزول دا؟ ، اها قالو مره جنو قايم عليهو، مرا بعند راجل ليلى، بعد عرست،
والدنيا شتا ، وصقط شديد ، لقاهو قاعد يتدفه في نار ،،، وقف جنبو وقال ليهو:
بربك هل ضممت إليك ليلى قبيل الصبح أو قبلت فاها
وهل رفت عليك قرون ليلى رفيف الأقحوانة في نداها؟
راجل ليلى انبهط ، واتخلع ، واتهجم ، لكن بعد شوية قال ليهو مادام حلفتني يا قيس
آآي سويت الانت بتقول عليهو ده ، قالو قيس شال ليهو جمرتين من قدام الراجل المسكين دا
ومسكن بايديهو فركن وعضه شلوفتو التحتانية وقعد يكورك
ويصيح
دا الخايف منو انا زااااااااتوا ،،

المصدر: قلب الجزيرة

             سوف اكتب هنا بعض من نوعيه الشواكيش

يوجد نوع من المصدومين عاطفيا هو من يتسبب بايذاء نفسه اي يدفع خطيبته دفعا لرقعه بالشاكوش في ام راسه وذلك بالوسواس .. يعني ناخذ نموذج في شكل اسكيتش ..
مثلا خالد وساره لهم خمس سنوات مخطوبين .. هو موظف في الحكومة وهي مدرسة .. ومنذ الخطوبة لا توجد خطوات تذكر تدل على ان الخطوبة هذه ستنتهي يوما ما نهاية سعيدة او حتى تعيسة .. وانما هي كلها وعود وجلوس في الحدائق المجانية حتى يقتصدوا في النفقات وتظل وفوراتهم في سباق مع الاسعار يثمنو دولاب بمليون يوفوروا المبلغ بعد ستة شهور يكون ثمن الدولاب اصبح بثلاثة ملايين .. وفجاه تحتفل الحلة بمقدم يا سر من امريكا بعد غربة دامت عشر سنوات ... وغالبا في كل حي توجد امراه نسناسة تنقل الاخبار بعد تضخيمها وتزيينها وتوجيهها هي عبر اجندة خفية تجي داخلة مثلا عند ناس ساره وتسمم جوهم باخبار من اختراعها ( كان شفتوا الدهب الجابوا ياسر لامه واخواته من امريكا .. كتل كتل وكبار كبار .. امه قالت ليه ترمم البيت قبل ما تفكر في خطوبة ولا عرس ... قاليها ترميم شنو يا امي هو دا بيت ؟؟ .. انا لازم اهدوا في الواطة دي وابنيه مسلح طابقين ... ومال الدولارات الجايي خاميها دي انا خاميها لمنو ؟؟ ... اها وتحت تحت كدا سمعت انه قال لاخواته فتشوا لي عروس ) وتخرج لتترك خلفها قطيع من الفيران تتوزع على صدور سارة وامها واخوتها وتبدا في اللعب على العب .
ونفس هذا الخبر بطريقه مختلفه تنقله لآل خالد مع التركيز على حكاية فتشوا لي عروس .. التي تجعل خالد يخرج مستاءا بكرسيه ليجلس امام البيت يراقب حركة سارة مع حركة السيارة الهمر وارد امريكا والتي هي مستفه بعطالة الحي صعودا ونزولا مع المغترب .. ياتيه الوسواس ليريحه ( امريكة شنو الفيها قروش قدر كدا صاحبك ادا الا يكون شغال شغل ما ياهو )..
بعد ذلك يكون اللقاء بين خالد وسارة ملئ بالنرفزة والاتهامات ......من نوع ( الصباح واقفة في باب بيتكم بالفستان لشنو ؟؟.... كنت بدفق موية الغسيل .... وين الخدامة ؟؟ ... الليلة ما جات .. طيب البسي توب ... ما كان في زول في الشارع غيرك ..)
وشفتك الصباح رفعتي يدك لياسر لامن جا ماري ببيتكم ....حياني ورديت ليه التحيه .... ليه ترديها ؟؟؟ لييه ما اردها هو ما ولد جيرانا وتربينا مع بعض ..
ليه لابسه وقاشرة كدا ماشة وين ... الا انت نسيت ماقلت الليلة عازمني مسرحية في قاعة الصداقة ؟؟ لا زمان ماكنت بتقشري كدا وتعملي مكياج .. الجد شنو ؟؟؟.. يا خالد انت في شنو مالك اليومين ديل ؟؟ ... حيكون مالي يعني ؟؟..ما انا صابره ومنتظراك لي خمس سنين ...
خلاص حاتزليني بحكاية الخمس سنين دي ...؟؟
ياخي الزلاك منو يا ابن الحلال وانا اول مره اجيب سيرتها ..
ايوا قولي كدا اظهري على حقيقتك ..
اوففففف انا ما ماشه المسرحية ولا حا اتحمل اكثر من كدا ..
قولي كدا من الاول انت عايزة سبب تفركشي بيه الخطوبة ..
ياخي هسع الجاب سيرة الخطوبة منو انا قلت ما ماشة المسرحية .. وعموما ياهي دي دبلتك ارتحت .. وتاني نقفل الموضوع لو سمحت لاتلفون ولا مسكول ..
صاحبنا يبتلع الشاكوش الذي سببه لنفسه وتتفاقم الحالة عنده عندما يكتشف انه ياسر خطب بنت خالته معه في امريكا ليست ساره وسيكمل الزواج هناك بعد ياخذ امه وابوه .

وهذا عادة اشبه بالكاميرا الخفية بمعنى مثلا يكون شلة من الاصدقاء الشفاتة المجرمين لاحظوا انه زميلهم يميل للحب ويصنعوا له مقلبا وغالبا تحدث عند الطلبة الجدد في الجامعات ( البرالمة) .. وهو بعض الناس وبالصفة خاصة ابناء القرى والاقاليم يكون دخلوا الجامعات المختلطة وفي ذهنهم ان العلاقات العاطفية مع احدى الزميلات شئ حتمي وكانه جزء من المقرر الدراسي .. لانهم توارثوا قصصا مرتبطة بذلك ممن سبقوهم على الجامعات المختلطة .. وحتى تتضح الصورة اليكم وقائع هذه القصة الواقعية التي دارت في زمن ما في اروقة جامعة الخرطوم . وحكاها لي احد الاصدقاء وسارويها مع اسماء افتراضية .
وقال وهو وزميله كانوا من ابناء مدينة بورتسودان .. وسكن معهم واحد من احدى القرى .. وقال لاحظوا عليه حرصه على التانق والتعطر والخروج مبكرا بعد صلاة العصر كانه على موعد مع احد ما وعندما يذهبوا لكافتريا النشاط يجدوه واقفا ينظر بتبسم فقط من بعيد الى البنات دون الاقتراب او التحدث مع احداهن .. قرا احدهم نفسيته وحكى للثاني ( تعرف يا عمر صاحبنا طاهر دا طاير ليه حب في راسه تعال نعمل فيه مقلب ) وفعلا اتفقوا بان كتبوا له رسالة عاطفية .. وقالوا فيها بمعنى ..
( عزيزي طاهر انا سعاد ... وبدون مقدمات او تطويل اصارحك باني وقعت في حبك .. ولكن كما تعلم حياء الفتاة لا تستطيع ان تفاتح الشاب بحبها .. وانما تنتظر قلبه دليله ليدلها عليه .. وانا كل يوم انظر لك تحتن الشجره متأنق ومتعطر .. كانك في موعد معي او في انتظاري .. او احاول ان اقنع نفسي ان الامر كذلك حتى اريح قلبي المتيم . ورغما عن ذلك لا اجرؤ في التقدم نحوك . واخيرا قررت ان اخط لك هذه الرسالة لاني لا استطيع الصبر اكثر من ذلك .. ساكتبها لك وانتظرك يوم الثلاثاء في نفس مكان وقوفك في الساعة ثلاثة عصرا قبول حضور الجميع .. وانا اريدك ان تعرفني بقلبك وليس بعينك فقط .. وستجدني قربك واتمنى ان اجد منك نفس التجاوب حتى اطفي نار الوجد في نفسي .. لاتنسى موعدنا الثلاثاء العصر .. المخلصة سعاد)

قال غلفوا الرسالة في ظرف ووضعوها في صندوق البريد . وهنالك من تطوع وسلمها لطاهر . وقال وكان اليوم الثلاثاء وكل ما دخلوا الغرفة وجدوا الطاهر يخبي الرسالة تحت المخدة مسرعا كانه يحتفظ بسر ما ويتبسم بنشوة ظاهره .. الى ان جاء يوم الثلاثاء ولكن هم نسوا الموضوع ولاحظوا ان الطاهر قد قام من الساعة اثنين بالاستحمام والتعطر المفرط والخروج ناحية الموعد .. اما هم فخرجوا كالعادة بعد العصر وراحوا ناحية النشاط وهم ناسين الموعد ووجدوا زميلهم في نفس المكان تحت الشجرة يتلفت بعد ان وقف ساعة ونصف دون نتيجة او ظهور سعاد ..

وقال بينما نحن واقفون كانت لهم زميلة من بورتسودان تعرفهم شاهدتهم وحضرت ناحيتهم .. ولكن فجاه صاحبهم طاهر انبرى لها ببسمة عريضة واستقبلها تحت دهشتها محييا ( اهلاااااااااا سعاد اتخرتي انا منتظرك من الساعة ثلاثة .. وبدا يعرفها بالشباب والذين هم اساسا اتت لاجلهم .. الاخ عمر .. الاخ حسن ) والبنت تنظر له باندهاش للشخص الذي لاتعرفه وهو يعرفها بالناس الذين حضرت لاجلهم مفترضا انه اسمها سعاد ورغما عن ان اسمها سوسن .ِ

وقال هنا عمر انتبه لفداحة الخطا وقال للطاهر عفوا يا طاهر الظاهر انت شبهت زميلتنا سوسن من بورتسودان وهذا زميلنا طاهر في السكن .. وتدارك الموقف .. ولكن في النهاية انه مصارحة الطاهر بالمقلب بعد ذلك لم تعد ممكنة لانه غرق في الموضوع بجدية شديدة .. وتركوه للايام يتلقى شاكوشا بطيئا عبر الزمن .. الطريف سوسن قالت لهم لو فهمتوني من اول كان شاركت في الموضوع .. وربما تحول الشاكوش لواقع ...

الشاكوش العرضي
وفي هذه الحالة تحدثت قصة الحب مع الشاكوش في ذات اللحظة .. نضرب مثال حتى تضح الصورة ..
واحد مسافر الى مدينة كسلا من الخرطوم ... ( والله ما انا) واقف في صف تذاكر البص تظهر حسناء رقيقة جميلة ..
- لوسمحت ممكن تقطع لي معاك تذكره ماده يدها بقيمة التذكره .. صاحبنا ما صدق وعلى قرار الحب من اول نظره تعلق بها ... واصر على عامل الشباك انه لازم يكون المقعدين متجاورين لانه هو مع اخته ولا يمكن يتركها تجلس قرب شخص غريب .. وبعد تصرف من عامل الشباك بتبديل احد المقاعد يحظى صاحبنا بالمقعدين المتجاورين ... ويغشى محل المجلات ويشتري مجلات نسائية من نوع سيدتي ولها وهي وغيرها .. ومناديل ورق معطره وعدة باكوهات من اللبان بمختلف النكهات .... ويتخلص من كيس الصعوت يلغي به ارضا تحت البص متحملا الخرم حتى كسلا ..
وبعد ان يركب البص يترك لها المقعد الذي يجاور الشباك حتى تكون هي من الداخل وبالتالي لا يشاركه فيها احد .. وبينما هو جالس ينتظرها تظهر له من تحت من ناحية الشباك وتقول له ..... لو سمحت ... نعم اتفضلي اركبي .. لا لا لا يا ريت بس ما انا المسافره .. مسافره معاك حبوبتي ... عاين ليها في الممر .. لو ما اكون تقلت عليك ممكن تراعيها لغاية كسلا .. هناك اخواني راح يلاقوك في الموقف .. ولو حصل اي طاري تلفوناتهم في الورقة دي ..
صاحبنا تلقى الشاكوش البارد بنكهة الفانيليا وهو ينظر ناحية المناديل والمجلات وينقنق ( طيب وسيدتي ولها وهي والمناديل ديل اوديهم وين ؟؟؟ وتمباكي الرميتو ؟؟)
الحبوبة : شلامتك يا ولدي .. قلت حاجة ؟؟
اخينا : شلامتك انتي يا حاجة ما في شي

المصدر: قلب الجزيرة

كنت معجبة جداً بقصة فاطمة السمحة، وكانت شقاوة طفولتي تكمن في طرح أول سؤال لمن يزورنا بالمنزل «بتعرف فاطمة السمحة؟؟» فإذا كان رده بالإيجاب طلبت منه بإلحاح أن يمكث معنا ليلة ذاك اليوم حتى «يحجيني» بها ليلاً، فقد أقنعني والدي أن زمن «الحجاوي» هو الليل فقط،
حتى يتفادى إزعاجي له أثناء النهار بإصراري الشديد أن يحكي لي باستمرار، فقد كنت أحب الاستماع للروايات الخيالية.. إلا أنني كنت أستغرب من أن قصة فاطمة السمحة تختلف من راوٍ لآخر مع أنهم يجتمعون فقط في أن فاطمة قد خطفها الغول.. إلا أن رواية واحدة فقط قد رسخت بذهني حتى الآن، فترعرعت على أنها الحقيقة، وهي التي روتها لي «حبوبة زهراء» رحمها الله، قالت إن فاطمة لم يأكلها الغول لأن أخاها كان شجاعاً قام باقتلاعها من فمه، ومن ثم وقف أمام الغول كدرع بشري حتى يحميها في الوقت الذي اختبأت فيه فاطمة خلف أخيها الذي أمسكها بيده اليسرى وقاتل الغول باليمنى، ثم أخبرتني أن كل بنات السودان هنّ فاطمة السمحة والأولاد هم إخوانهن، والظروف والمتاعب هي الغول، وضربت لي مثلاً بركوب المواصلات قائلة: «أسي في المواصلات لما تركب بت والمقاعد مليانة مش الأولاد بتسابقوا عشان يقيفوا ليها تقعد؟؟» رديت عليها بالإيجاب فأردفت «ما البت دي ذاتها فاطمة السمحة والبقوموا ليها ديل إخوانها»، من يومها لم أطلب من أحد أن يروي الحكاية، لأن «حبوبة زهراء» رسخت لي مفهومًا جميلاً وصورة رائعة لإخوان فاطمة السمحة، رحمك الله!! لقد افتقدتك كثيراً، فلو كنت موجودة بعد دخول بص الوالي لطلبت منك أن تعيدي لي صياغة حجيوة فاطمة السمحة، لأن معظم إخوانها قد تغيروا، مع تأكيدي أن بعضهم ما زال كما هو رجل المواقف، إلا أن الأغلبية فقدوا بعضاً من المروءة، أقول بعضاً لأن الظروف المحيطة قد تكون سبباً، ففي بص الوالي مثلاً مكتوب «أفضلية المقاعد الأمامية للنساء» وتجد أن المقاعد الثمانية الأولى بها رجال والبنات «مشمعات» الله يجازي التكييف هو السبب فما إن يستقل أحدهم هذا البص حتى يسترخي في مقعده ولا يحتاج الا لثوانٍ معدودة حتى ينام في سبات عميق فيحلم بعدها «بظروف اقتصادية أفضل» متأكدة أن لبص الوالي إيجابيات شتى لن أذكرها إلا أنني أقف في أعظم السلبيات الاجتماعية وهي موت روح التكافل إذا استثنينا «أخوات فاطمة» فهن شابات، وشاركن الرجل في كل المجالات فلا مانع من مشاركته الشماعة، إلا أنه في بعض الأحيان هنالك نساء كبار في أعمار الأمهات يظللن واقفات، نسأل الجهات المسؤولة فقط تأكيد أفضلية المقاعد الأمامية للنساء حتى تجلس «أم فاطمة» فقط بعد أن ضاع أخو فاطمة داخل بص الوالي.

رحيـل ابراهيم

قال لي أحبك.. فضحكت

قال لي أعشقك.. فخجلت

قال لي لن أتخلى عنك.. فضممته..

لكن لم يكن يعلم أني أعلم الحقيقه

وأن عيني رأت خداعه وغدره..

وأنني عندما ضحكت المره الأولى ضحكت على استهتاره..

وعندما خجلت فخجلت لغدره وكذبه..

وعندما ضممته.. ضممته لتوديعه للمرة الأخيره..

وأنا على يقين بأن النــدم سيزوره

توضأ حاج النعيم وحمل عصاته ميمما" وجهه شطر المسجد لأداء صلاة المغرب عندما نادته زوجته من داخل المنزل بصوت عال :
-النعيم هوووي
مغمغما" بصوت خافت
-الهوا اليشقك ،من يوم العيال سافرو خلو البيت خلا تنبحي اليوم كلو زي الكلب ... .
-بتطنطن تقول شنو يا النعيم؟
-لا لا ما بقول حاجة ، خبارك؟
-وإنت ماشي الجامع سوق معاك الغنماية دي وديها لي ناس حاج طه عشان عندو التيس يعشرا شكلها اليومين دي حالت
-خير
-ما تنسى تشيل معاك كليقة قصب عشان التيس بدور العلوق
أجابها بضجر :
-حاضر مش غنمايتك المكرهاني بيها دي بوديها عشان تاني أشوفك بتنقنقي في شنو؟
إبتسمت في خبث وتركته يذهب وأسرعت نحو حفرتها وأعملت فيها نظافة وجهزت كل لوازم جلستها تلك.
صلى حاج النعيم المغرب والعشاء في الجامع ثم غفل راجعا" إلي بيته الذي ما إن وطئت قدماه داخله حتى زكمت أنفه رائحة بخور الصندل القوية ، و وجد سريرين متوازيين في منتصف الحوش المرشوش لايفصل بينهما سوى صينية العشاء المغطاة بطبق ، وزوجته ست البنات تجلس في دلال في أحد السريرين وقد تسربلت بقرمصيص فقالت :
-حرما" يا أبوخالد ,ثم حملت إبريقا" مملوءا" بالماء وغسلت له يديه
-سمي يا أبو خالد قبال الأكل يبرد
-بسم الله
لم ينبس النعيم ببنت شفة بل أكل في صمت وكان بين الحين والآخر يرمقها في إستغراب إلى أن نفض يديه و
-الحمدلله
-ما تاكل يا أبوي الأكل ما عجبك ولا شنو؟
- شبعت
-خلاص دقيقة النغسل ليك إيدينك
-لا لا كملي أكلك بغسل براي
-من شبعت إنت أنا زاتي شبعت
حملت الصينية إلى المطبخ وعادت بالشاي لتفاجأ بحاج النعيم وقد جر سريره إلى جانب السور ونام موليها ظهره ما أغضبها وجعلها تروح وتغدو بقربه وتدق الأرض بقدميها بصوت مسموع عله يستيقظ ولما لم تجد حيلتها نفعا" رفعت صوتها بالقول :
-يا كافي البلاء ، تيس حاج طه الليل كلو يلبلب في الغنم والرجال نايمين تحت الحيط!! , إلتفت إليها مهددا" :
-يا ولية إتخمدي ، تيس حاج طه كل يوم مغيرين ليهو البهم ما يلبلب كيف؟ شفتيه قعد ليهو مع غنماية واحدة تلاته يوم خلي تلتين سنة؟؟!!!

الراكوبه

كانت الشفة بت بادي  إمرأة إستثنائية ، لم تكن ككل النساء اللائي مررن علي في حياتي ، بل لم تكن إمرأة إطلاقا" بإجماع كل من عرفها إلا في نظر جدي .
كانت ترتدي سروالا" بتكة كالرجال وتكتها طويلة تلامس التراب ،تتعاطى التمباك ولها حقة كبيرة والأعجب من ذلك إذا صادفتها وهي تحاجج بائعه
-يا خوي صعوطك اليومتا ده جبتو من وين؟!
-ما ياهو البتشيليهو طوالي يا الشفة!
-حرم ماهو
-كدي شوفي حق الليلة ده كيف؟
-بشوفو و كن طلع الفي مزاجي بشتري منك وكن طلع زي تفل يومتا بشيل ساي
-قادر الله يا بت بادي ، نقول شنو؟ إتفقنا
كفكفت كم جلبابها وربطته مع فتحة رقبة الجلباب ثم أدخلت يدها حتى كوعها في حلة التمباك وأخرجت سفة وضعتها تحت شفتها العليا ثم طفقت تلحس ما سال في يدها
-برضك مكتر العطرون ،عدمت الرجال الحيل يا يابا
ثم ألقت له بجنيه وأتبعت
-نعمل شنو حق الناس ما بندورو لكن نشيلك الذنب إنت
كانت سليطة اللسان ولوامة جدا" ،لذلك كانو يخبرونها بكل مناسبة أولا" بأول تفاديا" للومها ،لذلك عندما توفيت والدة جارة لهم في الحي وبعد أن ركب الرجال والنساء في الهايس على عجل لكي يلحقو الجثمان في المقابر تذكروها بعد أن كادو أن يصلو ، فعادو أدراجهم إتقاءا" للسانها .
نزلت واحدة منهم وفتحت باب منزلها الغير مغلق ووجدتها تتجهز للقيلولة بعد أن إستحمت وخلعت ملابسها جميعها ودهنت جسمها بزيت وتغطت بثوب خفيف ، فأخبرتها بأمر الوفاة فتجهزت وركبت معهم.
لم تجد مقعدا" شاغرا" سوى ذلك المجاور للكمساري المقابل لجميع الركاب ، وعندما حاول أحد الرجال أن يبدلها بمقعده حلفت
-حرم تقوم أكان أنزل
ما إن تحركت العربة حتى لعب الهواء بثوبها ورفعه ،ولكن لم تكترث نظرا" لسروالها أبتكة ،لكن يبدو أنها مع العجلة نسيته ، فحاولت إحدى النسوة تنبيهها بطريقة غير مباشرة
-جلابيتك دي زي المقلوبة يا بت بادي
-النبي؟!
وبدون مقدمات خلعت الجلباب لتستعدله
طيب الله ثراك يا بت بادي
مرة سألت جدي:
-العجبك في حبوبة دي شنو؟
-ولا حاجة
-كيف الكلام ده وعرستها كيف؟
-وهو أنا شفتها غير يوم الدخلة
-؟!!!!
-والله يا جنا أنا حبوبتك دي عشان أميزا مرة ولا راجل إلا قيدوها لي بالجنازير ، خوفتني عديييل ، تقيف لي في نص الحوش وتقول لي هسة إنت أحسن مني بشنو عشان تعرسني
-كنت بتحبها؟
-بالحيل أمال الجابرني عليها شنو
-حصل قلت ليها إنك بتحبها؟
-ليه إنت قايلني باطل
سبحان الله هذا الرجل الكاتم لحبه بكى كرضيع حين وفاتها ، ورغم أنهم طوال حياتهم الزوجية التي إستمرت لأكثر من خمسين عاما" ولم يتبادلا فيها كلمة حب واحدة ، إلا أنه لم تعكر صفو حياتهم أي شائبة ،فشتان مابين زمانهم وزماننا.

الراكوبه